Gjermania premton 6 miliardë euro në vit për financimin e klimës

Ilustrim, Pixabay

Një koalicion liderësh nga vendet e industrializuara dhe vendet e cenueshme nga klima bëri thirrje sot për financime më ambicioze për klimën në Konferencën e OKB-së për Ndryshimet Klimatike, ose COP29, në Baku.

“Kërkohen triliona dollarë. Ne duhet të rrisim urgjentisht sasinë e financimit për veprimin klimatik”, thuhet në një deklaratë të nënshkruar nga liderët që janë pjesë e të ashtuquajturit “Koalicioni i Ambicieve të Larta COP29”.

“Kriza klimatike do të përkeqësohet në mënyrë eksponenciale nëse nuk veprojmë tani”, thuhet në deklaratë.

“Vendet e zhvilluara duhet të vazhdojnë të marrin drejtimin dhe të përmbushin angazhimet ekzistuese financiare. Burimet novatore të financimit duhet të zhvillohen”, sipas deklaratës.

Gjermania, Franca, Spanja dhe Kanadaja, si dhe disa vende ishullore dhe vende afrikane, e mbështetën apelin.

Gjermania ka premtuar 6 miliardë euro (6,4 miliardë dollarë) në vit për financimin e klimës, duke filluar nga viti i ardhshëm.

Por, planet e mëparshme buxhetore zbuluan një mungesë në mbledhjen e këtyre fondeve dhe aktivistët e klimës kanë paralajmëruar se Gjermania rrezikon të humbasë besueshmërinë nëse dështon të përmbushë angazhimet.

Qëndrimi i Italisë për klimën ka shqetësuar partnerët që nga zgjedhja e kryeministres së ekstremit të djathtë, Giorgia Meloni.

Ajo deklaroi në Baku se nuk kishte ndërmend të tërhiqej nga lufta ndërkombëtare kundër krizës klimatike.

“Një qasje që mbetet shumë ideologjike dhe jo pragmatike për këtë çështje rrezikon të na largojë nga rruga e suksesit”, tha Meloni në kryeqytetin e Azerbajxhanit.

“Neutraliteti i teknologjisë është qasja e duhur”, shtoi ajo, duke mbrojtur një këndvështrim realist global.