37 vjeçari shqiptar vritet në Itali në prani të djalit

Foto ilustrim

Një 37-vjeçar shqiptar është vrarë me armë zjarri mbrëmjes e së dielës në fshatin Oratoio, në periferi të Pizës në Itali. Mediat italiane bëjnë të ditur se ngjarja ka ndodhur rreth orës 21:00 të së dielës, në oborrin e shtëpisë së tij dhe në prani të djalit.

Beni A. sapo ishte kthyer në shtëpi dhe kishte parkuar fugonin kur u vra dhe makina ishte ende e ndezur kur mbërriti policia.

Viktima ishte pa precedentë penalë, dhe nuk dihet ende motivi i vrasjes. Sipas dëshmitarëve disa plumba u qëlluan drejt tij, por një prej tyre rezultoi të ishte fatal duke e kapur në kokë. Dëshmitarët thonë se kanë parë dy persona të largohen nga vendngjarja me skuter, ndërsa policia është ende duke bërë hetime.

Mediat italiane bëjnë të ditur se lagjja Oratorio është tronditur. Në rrjetet sociale famullitari shkroi: “Tingulli i gëzueshëm i kambanave u përzje me shpërthimin e ftohtë të të shtënave vdekjeprurëse”.