Rruga për në fshatin Banjskë merr emrin e Afrim Bunjakut

Qeveria e Kosovës ka marr vendim për të emëruar rrugën që të çon për në fshatin Banjskë të Komunës së Zveçanit me emrin e rreshterit, Afrim Bunjaku të vrarë nga sulmi terrorist i 24 shtatorit të vitit 2023.
“Qeveria merr vendim për të emërtuar Rrugën Rajonale R-217 segmenti: Ballaban – Banjskë, me emrin e Heroit të Republikës së Kosovës “Afrim Bunjaku””, thuhet në njoftimin e ekzekutivit.
Përurimi i emrit të rrugës është bërë mëngjesin e së martës ku pjesëmarrës ishte edhe kryeministri i Kosovës, Albin Kurti.

Në deklarimin e tij para medieve, kryeministri Kurti potencoi se Banjska e 24 shtatorit 2023 ka qenë një plan për të sulmuar Kosovën ka qenë një agresion kundër sovranitetit shtetëror, integritetit territorial, paqes, sigurisë, kushtetutshmërisë, dhe ligjshmërisë.

“Plani ishte që të ndahet Kosova, plani ishte që të aneksohet një pjesë e territorit dhe rënia e Afrim Bunjakut nuk ishte e kotë, përkundrazi ajo është fitore e madhe e shtetit të Kosovës për të gjithë qytetarët pa dallim dhe në mbrojtje të tërësisë tonë territoriale. Kosova është një dhe e pandashme”, deklaroi kryeministri.