BE: 160 milionë euro fonde për energji i jepen Ukrainës

Von der Leyen sot në Ukrainë për të diskutuar për ndihmën milionëshe për energjinë

Shefja e Komisionit Evropian, Ursula von der Leyen, sot po qëndron për vizitë në Ukrianë, për të diskutuar rreth ndihmës prej 160 milionë euro fondesh për energjinë, në mënyrë që dimri të kalohet më lehtë në vendin e shkatërruar nga lufta.

Von der Leyen u ka thënë gazetarëve të enjten se 100 milionë euro nga fondet do të jenë nga asetet e ngrira ruse për shkak të pushtimit të Ukrainës.

“Është e drejtë që Rusia të paguajë për shkatërrimin që shkaktoi”, ka thënë ajo, raportoi AP.

Bashkimi Evropian vlerëson se rreth gjysma e infrastrukturës energjetike të Ukrainës është shkatërruar, duke e bërë punën e ngrohjes së shtëpive, spitaleve dhe shkollave gjithnjë e më të vështirë, ndërsa temperaturat bien përpara dimrit të tretë me luftë, me të cilin do të përballet vendi.

Von der Leyen ka thënë se Rusia e dinte mirë se bombardimi i stacioneve energjetike ishte goditje për pikën më të dobët të Ukrainës. 

“Si miq dhe partnerë të Ukrainës, ne duhet të bëjmë gjithçka që mundemi për të mbajtur dritat ndezur. Dhe, ndërsa dimri po afron, ne duhet të mbajmë ngrohtë popullin e guximshëm të Ukrainës”, ka deklaruar von der Leyen. 

BE-ja vlerëson se i ka dhënë Ukrainës të paktën 2 miliardë euro si mbështetje energjetike që nga pushtimi i shkurtit të vitit 2022. 

Von der Leyen ka bërë të ditur se do të takohet të premten me presidentin Volodymyr Zelensky në Kiev për të diskutuar çështjet e energjisë.

 

---