61% e gjermanëve kundër migrantëve që nuk janë në BE

Vetëm në gjashtë muajt e parë të vitit 2014 në Gjermani kanüe hyrë 667 mijë të huaj, ose 112 mijë (20%) më shumë se një vit më parë

Një shumicë solide e gjermanëve, 61 për qind, janë kundër migrimit në Gjermani të shtetasve nga vendet që nuk janë në BE. Këtë rezultat e tregon „Eurobarometri” i kryer në nivel nacional, i sponsorizuar nga Komisioni i BE-së. Përqindja në fjalë është pak më e lartë se ajo e mesatares së qytetarëve të të gjitha vendeve të BE-së, e cila, marrë së bashku, është 57%.

Por, shumë më i lartë se në Gjermani refuzimi i të huajve të shteteve jashtë BE-së është në vendet si Italia (75%). Letonia (79%) ose Sllovakia (74%). Më së paku kundër kësaj kategorie të të huajve janë suedezët me vetëm 25%, ndërsa britanikët me 57% dhe francezët me 58% janë në mesatare.

Ndërkaq, qëndrimi i gjermanëve ndryshon nga ai i shumicës së qytetarëve të tjerë të BE-së kur bëhet fjalë për rëndësinë që ata i japin problemit të migracionit. Për 37 për qind të gjermanëve, migracioni është problemi më i rëndësishëm i Evropës sot, më i rëndësishëm se sa kriza e borxheve, shkruan süddeutschezeitung.de. Mesatarja në BE lidhur me këtë problematikë është shumë më e ulë, gjegjësisht 18%. Vetëm Britania e Madhe dhe Malta e konsiderojnë migracionin si problemin numër një për Evropën. 38% të britanikëve dhe 57% të maltezëve kanë këtë qëndrim.

Duhet theksuar se sipas statistikave më të reja, vetëm në gjashtë muajt e parë të vitit 2014 në Gjermani kanüe hyrë 667 mijë të huaj, ose 112 mijë (20%) më shumë se një vit më parë. Gjatë po kësaj kohe Gjermaninë e kane braktisur rreth 420 mijë banorë, kështu që ardhjet “neto” të të huajve janë rreth 240.000.