Zvicra ka forcuar kontrollet kufitare nga 1 qershori

qeveria ka vendosur të forcojë kontrollet në kufijtë e Zvicrës nga 1 qershori deri në përfundimin e Lojërave Paralimpike

Për shkak të kërcënimit të shtuar të terrorizmit gjatë Kampionatit Evropian të Futbollit në Gjermani dhe Lojërave Olimpike Verore në Francë, Zvicra po ‘rriton përkohësisht’ kontrollet në kufijtë e saj.

Organizata terroriste “Shteti Islamik” (ISIS) bëri thirrje për sulme kundër këtyre ngjarjeve sportive, shkruan The Local, transmeton albinfo.ch.

“Edhe nëse Zvicra nuk ekspozohet drejtpërdrejt sa dy fqinjët e saj, ngjarjet publike të organizuara në tokën zvicerane në lidhje me këto gara, mund të jenë gjithashtu në rrezik sulmesh”, tha Këshilli Federal.

“Përveç kësaj, konferenca për paqen në Ukrainë, e cila po zhvillohet në të njëjtën kohë në Bürgenstock, është gjithashtu një ngjarje e dukshme”.

Përballë këtyre kërcënimeve, qeveria ka vendosur të forcojë kontrollet në kufijtë e Zvicrës nga 1 qershori deri në përfundimin e Lojërave Paralimpike, më 8 shtator 2024.

“Po zbaton kontrolle në kufijtë me Zvicrën për të luftuar terrorizmin, bazuar në një analizë rreziku. Inspektimet e mallrave dhe personave të kryera nga Zyra Federale e Doganave dhe Sigurisë Kufitare (OFDF) do të intensifikohen në pikat e kalimit kufitar dhe në zonat kufitare”, thuhet në njoftimin për shtyp.

Çfarë do të thotë saktësisht kjo?

Zakonisht, njerëzit që mbërrijnë në Zvicër nga zona Shengen me makinë, tren ose aeroplan, mund të hyjnë në vend pa asnjë kontroll.

Por për tre muaj e gjysmë të ardhshëm, do të shihni më shumë roje kufitare dhe mund t’ju kërkohet të paraqisni pasaportën ose kartën tuaj të identitetit.

Megjithatë, këto përgjime nuk do të jenë sistematike, por të rastësishme. “Këshilli Federal vlerëson se këto masa do të ndihmojnë në forcimin e sigurisë dhe, nga ana tjetër, parandalimin e një sulmi terrorist”, shtoi qeveria.

Nuk ka pasur asnjë kontroll në kufijtë e Zvicrës që nga fundi i pandemisë Covid.

---