Rama diasporës në Itali: Shqiptarët, nga damka “e stato un albanese”, te shëmbëlltyra e ribashkimit europian

Kryeministri Edi Rama, fjalimin në pallatin e sportit “Busto Arsizio” në Itali, e nisi me një falënderim për pritjen që shqiptarët i bënë në këtë takim të radhës me diasporën.

“Jam thellësisht i prekur. Dua ta dini që më ka emocionuar vala e nxehtë e përshëndetjeve të shumë shqiptarëve që më kanë shkruar për t’i vizituar,” u tha kreu i qeverisë të pranishmëve.

Fjalimin e tij, Rama e nisi duke kujtuar kohët e errëta të eksodit të shqiptarëve drejt Italisë, e deri në ditët e sotme kur shqiptarët tashmë janë të integruar në shoqërinë e vendit fqinj.

Në vëmendje, Rama solli se shqiptarët i ndiqte fillimisht damka “e stato un albanese”, dhe fajësoheshin për çdo gjë të keqe që mund të ndodhte në vendin fqinj.

“Italianët nuk ia kishin idenë se përtej asaj që dukej… duke ecur si të goditur pas kokës, fshihej një shpirt i marrosur me italian, se i italianit më të saktë. Një adhurim deri në vetëmohim, i një Italie që në mendjen e shqiptarëve kishte marrë pamjen e një toke të shenjtë. Një dashuri e verbër pa kushte, që nuk i linte gjë mangët të gjitha dashurive platonike.”, transmeton A2 përcjell albinfo.ch.

Për Ramën, shqiptarët e Italisë, janë “shëmbëlltyra e pararojave shqiptarë të ribashkimit me Europën”, dhe këtë shton ai, nuk e ka bërë as politika, as media dhe as biznesi.