Cyrih: Zhvillohet seminari “Institucionalizimi i mësimit plotësues të gjuhës shqipe në diasporë – Zvicër”

Nën realizimin e Konsullatës së Republikës së Kosovës në Cyrih këtë fundjavë është zhvilluar seminari me temën “Institucionalizimi i mësimit plotësues të gjuhës shqipe në diasporë – Zvicër”.

Zëvendësministrja e Punëve të Jashtme dhe Diasporës, Liza Gashi, ka deklaruar se në seminar ka qenë e pranishme edhe ministrja e Arsimit, Shkencës, Teknologjisë dhe Inovacionit, Arbërie Nagavci, teksa ka shkruar se së bashku me mësuesit e mësimit plotësues në gjuhën shqipe kanë diskutuar për hapat e institucionalizimit të mësimit plotësues në gjuhën shqipe, rolit institucional në këtë drejtim, mundësitë dhe hapat që duhet të ndërmerren, si dhe rëndësinë e bashkëpunimit dhe komunikimit ndërmjet mësimdhënësve të gjuhës shqipe në Diasporë dhe institucioneve të Republikës së Kosovës.

“Po ashtu theksova se si qeveri kemi ndërmarrë hapa konkretë në adresimin e nevojave të parashtruara. Këto punëtori që po i mbajmë nëpër shtete të ndryshme ku jeton Diaspora jonë, i shohim si hapa drejt ndërtimit të një dialogu institucional, me fokus fuqizimin e trekëndëshit nxënës, prind dhe mësues shqiptarë. Një falënderim i veçantë për të gjithë mësuesit e gjuhës shqipe për kontributin e tyre në ruajtjen dhe kultivimin e gjuhës dhe kulturës shqiptare”, ka shkruar ajo, transmeton albinfo.ch.