Ministri gjerman i Financave: Synimi i Putinit nuk është Ukraina, por Evropa

Keystone EPA/SERGEY KOZLOV

Ministri gjerman i Financave, Christian Lindner, ka deklaruar se Gjermania do të vazhdojë ta përkrahë Ukrainën si një mburojë kundër synimeve të presidentit të Rusisë, Vladimir Putin.

“Ne po e mbështesim Ukrainën, sepse ajo është vija e parë e mbrojtjes sonë kundër Putinit. Përmes pushtimit të Ukrainës, që e nisi më 2022, Putini dëshiron të na sulmojë të gjithëve dhe mënyrën e jetës sonë. Putini nuk dëshiron vetëm ta fshijë Ukrainën nga harta, por t’i ndajë Evropën dhe NATO-n dhe të sigurohet që Shtetet e Bashkuara të largohen nga Evropa. Synimi i Putinit nuk është Ukraina. Synimi i Putinit është të jetë në gjendje të ushtrojë pushtet mbi neve. Ai nuk duhet të ketë sukses në këtë kurrë”, ka thënë ai, transmeton albinfo.ch.

Tutje ai ka deklaruar se për këtë arsye, Gjermania duhet t’i përmirësojë patjetër aftësitë mbrojtëse për ta mbrojtur veten dhe aleatët e vet, ndërsa ka theksuar se fondi i veçantë që u krijua për ta përditësuar ushtrinë gjermane, pasi Rusia e nisi pushtimin e Ukrainës më 2022, do të përdoret brenda pak viteve, shkruan Radio Evropa e Lirë.

“Detyra që na pret për ta mbrojtur paqen dhe lirin në Gjermani, Evropë dhe në botë nuk është e kufizuar në vetëm në disa vite. Mbase është një detyrë që zgjat me dekada apo gjenerata”, tha Lindner.