Franca dhe Gjermania nënshkruajnë një projekt “miliardësh”

Foto Twitter: @SebLecornu

Ministri i Mbrojtjes i Francës, Sebastien Lecornu, ka pritur sot në takim, në Paris, homologun e tij gjerman, Boris Pistorius.

Takimi është zhvilluar me qëllim që të ratifikohet një marrëveshje mbi një projekt të ri të përbashkët tankesh të quajtur “Sistemi kryesor i luftimit tokësor” (MGCS), transmeton albinfo.ch.

Marrëveshja formale nis zhvillimin e fazës së parë të mjetit të blinduar, të quajtur “tanku i së ardhmes” – një projekt me vlerë miliarda euro. Tanku i ri i betejës do të zëvendësojë tankun gjerman Leopard 2 dhe Leclerc të Francës, shkruan Euronews.

Ata këmbëngulën se projekti nuk duhet të shihet si një model i ri i tankut Leopard 2, një nga mjetet luftarake më të avancuara në botë.

“Nuk bëhet fjalë për të bërë një Leopard 3 ose 4, por për të dizajnuar diçka krejt të re”, ka thënë Pistorius.

Tanku thuhet se do të përfshijë inteligjencën artificiale dhe do të ketë disa sisteme të automatizuara që nuk do të kërkojnë “pilotë njerëz”, ndërsa ministrat njoftuan se shpërndarja e kontratave për prodhuesit pritet të finalizohet deri në fund të vitit.