Gërvalla: Serbia shkeli masivisht të drejtat e njeriut

Ministrja e Punëve të Jashtme dhe Diasporës, Donika Gërvalla-Schwarz, ka folur në një konferencë për media në orët e pasdites për ndalesat e qytetarëve të Kosovës nga Serbia. Ajo tha se Serbia shkeli masivisht të drejtat e qytetarëve kosovarë për lëvizje të lirë.

“Jemi dëshmitarë të deklaratave kërcënuese të presidentit serb, Vuçiq, gjatë ditëve dhe javëve të kaluara, i cili ka kërcënuar jo vetëm Kosovën, por edhe partnerët dhe mbështetësit e Kosovës që vota pozitive në Këshill të Evropës do të ketë pasoja. Vuçiqi ka filluar t’i jetësojë kërcënimet e tij, në këtë kontekst e shoh unë ndalimin e sotëm të udhëtarëve, jo vetëm në autobus, por edhe në vetura. Dhe sidomos ndalimin e shumë zyrtarëve të policisë”, tha ajo.

Sipas kryediplomates kosovare, të ndaluarit iu nënshtruan bisedave informative për vitin 1999 dhe për anëtarë të UÇK-së.

“Një numër i madh i tyre u është nënshtruar edhe atyre që ne jemi mësuar t’i quajmë “biseda informative”. Shumë prej atyre që janë marrë në pyetje kanë pasur si qëllim të flitet për vitin 1999, anëtarë të UÇK-së. Por për këto jam shumë e sigurt që institucionet tona të sigurisë, në momentin që i kemi plotësuar të gjitha të dhënat, do të bëhen publike”, tha Gërvalla.