Deputeti gjerman: E padrejtë nga SHBA-ja që Kosovës t’i vendosen kushte të reja për anëtarësim në KE

Kryetari i Komitetit për Punë të Jashtme në Bundestagun gjerman, Michael Roth, pas deklaratës së emisarit amerikan për Ballkanin Perëndimor, Gabriel Escobar, se për anëtarësimin në Këshillin e Evropës, Kosovës i kanë mbetur edhe dy kushte, e ka kritikuar SHBA-në se po i vendos kritere të reja Kosovës për t’u anëtarësuar në Këshillin e Evropës.

Përmes një postimi në rrjetin social “Twitter”, ai ka thënë se kjo qasje e pabalancuar ndaj Kosovës duhet të përfundojë, transmeton albinfo.ch.

“Është krejtësisht e pakuptueshme që SHBA vendos ekstra kushte për anëtarësimin e Kosovës në Këshillin e Evropës. Kjo qasje e pabalancuar nga SHBA-ja drejt Kosovës duhet përfundimisht të përfundojë. S’është fer dhe është e padrejtë. Këshilli i Evropës dhe shtetet anëtare ulen në ulësen e shoferit – jo SHBA-ja”, ka shkruar ai.

Ndërkaq, gjatë ditës së djeshme edhe dy deputetë gjermanë, Frank Schwabe, nga grupi socialdemokrat (SPD) dhe Knut Abraham nga radhët e CDU/CSU kanë reaguar ndaj deklaratave të Escobarit.

Abraham ka thënë se Asambleja Parlamentare e Këshillit të Evropës do të përcaktojë në mënyrë të pavarur kriteret e anëtarësimit të Kosovës në KE. Ndërkaq, Shwabe ka thënë se Këshilli i Evropës do të vendosë për anëtarësimin e Kosovës bazuar në rregullat dhe vlerat e veta.

It’s completely incomprehensible that the 🇺🇸 sets extra conditions for Kosovo's membership in the Council of Europe. This unbalanced approach by the US towards Kosovo must finally stop. It’s unfair and unjust. The @coe and its member states sit in the driver’s seat – not 🇺🇸! https://t.co/mi89SJ5AOx

— Michael Roth – official 🇪🇺🇺🇦🇮🇱🇬🇪 (@MiRo_SPD) March 16, 2024