107 kosovarë pa dokumente kapen brenda një jave

Nga 276 migrantët pa dokumente më së shumti ka pasur shtetas kosovarë, 107 sish

Vetëm në regjionin Niederbayern të Bavarisë gjatë një jave janë kapur 276 persona pa dokumente valide për qëndrim në Gjermani. Siç bën të ditur policia, këta persona janë kapur nga 16 deri më 22 janar në raste të ndryshme në përpjekje për të hyrë në Gjermani për të kërkuar azil. Shumica e tyre janë zënë duke kaluar me tren nga Austria si dhe në autostradën A3.

Të gjithë migrantët pa dokumente janë shoqëruar në qendrën për pranimin e azilkërkuesve në Deggendorf. Më së shumti në mesin e tyre (107) janë shtetas kosovarë. Më tutje vijnë shtetasit e Sirisë (69), të Afganistanit (64) etj.

Në kuadrin e gjithë kësaj janë kapur edhe 17 kontrabandistë. Prej tyre, shtatë janë hungarezë, dy sirianë (me leje qëndrimi në Gjermani) dy kosovarë, një bohsnjak, një maqedonas, një bullgar, dy rumunë dhe një austriak. Të gjithë këta duhet të përgjigjen për trafikim të të huajve. Pesë prej tyre po mbahen në burgun për hetime, ndaj të tjerëve janë duke u zhvilluar ende hetimet.