LDK-ja kremton Ditën e Pavarësisë në Winterthur

Nën organizimin e Lidhjes Demokratike të Kosovës-Dega Lindore në Winterthur të Zvicrës, u festua 16-vjetori i Pavarësisë së Kosovës.

Të pranishëm në këtë festë, e cila u shoqërua me program kulturo-artistik, ishin mysafirë specialë nga Kosova dhe Zvicra.

Nga kryesia e LDK-së morën pjesë nënkryetarët Anton Quni, Jehona Lushaku -Sadriu, Doarsa Kica-Xhelili si dhe anëtarët e kryesisë së LDK-së, Sokol Haliti e Armend Zemaj.

Para të pranishmëve fillimisht u intonua himni shtetëror i Kosovës dhe ai i Dardanisë, derisa një fjalë rasti e mbajti nënkryetari i LDK-së, Anton Quni.

“Pavarësia e Kosovës ka emrin dhe emblemën e Presidentit Rugova, i cili ishte lideri që i dha popullit shqiptar zemër e guxim për Liri. Presidenti Dr.Ibrahim Rugova me laps dhe Adem Jashari me pushkë, janë emri i vërtetë i Kosovës, janë burrat më emblematikë të historisë së Kosovës“, tha Quni teksa shtoi se besimi i qytetarëve në LDK në mbarë Kosovën po forcohet çdo ditë. “Kjo është përgjegjësi për ne, për LDK-në si partia më e vjetër në Kosovë që ka vënë themelet e shtetit të Kosovës. Duhet të përgatitemi për të marrë përsipër sfidat e forcimit dhe zhvillimit të shtetit të Kosovës”, u shpreh ai.

Në shenjë nderimi kryesia e Degës e LDK-së Lindore i ndau mirënjohje Anton Qunit, Armend Zemajt e Sokol Halitit.