Presidenti ukrainas nënshkruan marrëveshje sigurie me Gjermaninë dhe Francën

EPA/SERGEY DOLZHENKO

Presidenti i Ukrainës, Volodymyr Zelensky, ka nënshkruar sot një marrëveshje bilaterale të sigurisë me Gjermaninë, teksa një tjetër pritet ta nënshkruajë me Francën gjatë ditës së sotme.

Zelensky është takuar sot në Berlin me kancelarin gjerman, Olaf Scholz, ndërsa më vonë do të udhëtojë për në Paris, për t’u takuar me presidentin francez, Emmanuel Macron, transmeton albinfo.ch.

Scholz përmes një postimi në rrjetin social “Twitter” ka shkruar se ai dhe Zelensky kanë nënshkruar “një marrëveshje mbi zotimet tona afatgjata të sigurisë”, teksa e quajti atë “një hap historik”, raporton Associated Press.

Deri më tani nuk janë dhënë më shumë detaje në lidhje me marrëveshjen, ndërsa marrëveshjet dypalëshe të sigurisë dhe mbështetjes afatgjatë vijnë pas një marrëveshje sigurie midis Ukrainës dhe Mbretërisë së Bashkuar, e cila është nënshkruar muajin e kaluar dhe mbulon 10 vjetët e ardhshme.