Sot zgjidhet kryeministri i parë shqiptar në Maqedoninë e Veriut

Duke nisur prej orës 11:00, në një seancë të jashtëzakonshme në Maqedoninë e Veriut do të zgjidhet kryeministri i qeverisë teknike.

Për herë të parë, kryeministër i Maqedonisë së Veriut do të jetë një shqiptar, Talat Xhaferi, i cili do të ketë mandat 100-ditësh.

Parlamenti i Maqedonisë së Veriut do të mblidhet në seancë për të debatuar mbi programin dhe kabinetin e Xhaferit, ndërsa deri në mesnatë pritet të votohet dhe të miratohet qeveria teknike, raporton RTSH.

Xhaferi i ka dorëzuar në Kuvend emrat e kabinetit me të cilin do të udhëheqë vendin deri në zgjedhjet e 8 majit.

BDI, partia shqiptare në koalicionin qeverisës, ka propozuar emrat e 5 ministrave dhe 3 zëvendësministrave për qeverinë teknike.

Në sallën e Kuvendit do të jetë e pranishme edhe partia më e madhe opozitare VMRO-DPMNE, po ajo paralajmëroi se nuk do të votojë për Qeverinë teknike./RTSH