Çfarë statusi ligjor marrin fëmijët e lindur nga prindër të huaj në Zvicër?

Nëse po planifikoni të keni një fëmijë, ose ndoshta sapo keni lindur, mund të pyesni veten se cila do të jetë gjendja e tij/saj ligjore në Zvicër, përcjell albinfo.ch.

Në rast se shpresoni që fëmija të jetë automatikisht zviceran, kjo nuk do të ndodhë nëse ju dhe bashkëshorti juaj jeni shtetas të huaj.

Ndryshe nga vendet e tjera, duke përfshirë Shtetet e Bashkuara dhe Kanadanë, për të përmendur vetëm dy, fakti i thjeshtë i të qenit i lindur në Zvicër nuk do të thotë se personi konsiderohet zviceran.

Nëse prindërit e tyre kanë lindur jashtë vendit dhe kanë ende pasaporta të huaja, fëmija nuk do të marrë nënshtetësinë zvicerane me lindje.

Përjashtimi i vetëm nga ky rregull është se nëse njëri ose të dy prindërit janë natyralizuar para lindjes së fëmijës.

Kjo vlen edhe nëse ata janë shtetas të dyfishtë – pra, janë natyralizuar në Zvicër, por ende ruajnë shtetësinë e vendit të tyre.

Në këtë rast, fëmija do të jetë zviceran, edhe pse ai ose ajo mund të ‘trashëgojë’ shtetësinë origjinale të prindërve, duke u bërë kështu edhe shtetas i dyfishtë.

Përndryshe, ata do të kenë të njëjtën kombësi si prindërit e tyre dhe do të vazhdojnë të konsiderohen si të huaj – derisa dhe nëse ata vetë natyralizohen më vonë.

Pra, cili do të jetë statusi ligjor i fëmijëve në Zvicër?

Ata do të kenë të njëjtën kombësi dhe të njëjtat pasaporta si prindërit e tyre dhe do të vazhdojnë të konsiderohen si të huaj, ndërkohë që mund të jetojnë legalisht në vend.

Ata do të kenë të drejtë për të njëjtin lloj leje qëndrimi siç kanë prindërit e tyre dhe mund të qëndrojnë ligjërisht në Zvicër për sa kohë që prindërit jetojnë këtu.

A mund të bëhen përfundimisht zviceranë?

Pasi të mbushin 18 vjeç, ata mund të aplikojnë për shtetësi dhe mund të përfitojnë nga një proces natyralizimi i shpejtë (i thjeshtuar), për sa kohë që kanë një leje C dhe kanë përfunduar së paku pesë vjet shkollë të detyrueshme në Zvicër.

Një avantazh që të huajt e lindur në Zvicër kanë ndaj emigrantëve “të rregullt” është se përmbushja e të paktën dy kërkesave të shtetësisë do të jetë një e lehtë për ta: njohja e gjuhës dhe integrimi.

A do të ndryshojë ligji ndonjëherë për të lejuar të huajt e lindur në Zvicër të jenë zviceranë që nga lindja?

Hapa politikë përpara janë bërë në këtë drejtim, me deputetët e majtë që shprehin keqardhje për faktin se “të huajt e gjeneratës së dytë, të cilët i kanë rrënjët këtu, shpesh janë pa pasaportë zvicerane”.

Megjithatë, deri më tani, këto përpjekje kanë hasur në kundërshtimin e të djathtëve në Parlament, kështu që nuk ka ndryshime në legjislacionin ekzistues në horizont në të ardhmen e afërt.

​

 

---