AAK-ja e Nisma bëhen bashkë për zgjedhje

Përditësim

Në tekstin e deklaratës thuhet se AAK dhe NISMA Socialdemokrate lidhin marrëveshje koalicioni për zgjedhjet e përgjithshme të radhës 2024-2025, përcjell albinfo.ch. 

Të dyja partitë dakordohen që të krijojnë frontin e përbashkët për shtetin e Kosovës dhe përcaktohen të hapura për zgjerim të koalicionit me të gjitha ato parti politike, nisma qytetare apo shoqata që përfaqësojnë sfera të ndryshme interesi e që për synim kanë ndaljen e degradimit të shtetit, rikthimin e demokracisë si parakusht të një zhvillimi të qëndrueshëm afatgjatë, si dhe integrimin e Kosovës në strukturat euro-atlantike, thuhet në tekst.

AAK dhe NISMA Socialdemokrate garojnë në një listë të përbashkët dhe marrin përsipër që të harmonizojnë platformën politike dhe programin për zgjedhjet e përgjithshme kurdo që ato të mbahen.

Objektivat politike dhe aspektet teknike të këtij koalicioni specifikohen me një aneks të veçantë që do t’i bashkohet kësaj marrëveshjeje, përfundon deklarata e përbashkët e AAK-së dhe NISMA Socialdemokrate e Kosovës.

AAK-ja e Nisma pritet të bëhen bashkë për zgjedhje

Së fundmi Aleanca për Ardhmërinë e Kosovës (AAK) ka njoftuar se Këshilli i Përgjithshëm i saj të mërkurën do të vendosë për koalicion parazgjedhor më Nismën Socialdemokrate, përcjell albinfo.ch.

“Këshilli i Përgjithshëm i Aleancës për Ardhmërinë e Kosovës sot vendos për koalicionin parazgjedhor AAK-Nisma”, thuhet në njoftimin e AAK-së.

Në njoftim thuhet se pas mbledhjes së Këshillit të Përgjithshëm, në ora 18:00 do të mbahet konferencë për media në selinë e AAK-së në Prishtinë.