UEFA ka ndarë fondet për ekipet pjesëmarrëse në Euro 2024

Foto FB: UEFA

Komiteti Ekzekutiv i UEFA-s ka miratuar sot sistemin e shpërndarjes së parave për ekipet pjesëmarrëse në Kampionatin Evropian 2024 që do të mbahet në Gjermani, shkruan albinfo.ch.

Përmes një postimi në rrjetin social “Facebook”, bëhet e ditur se shuma, e cila është paraparë të shpërndahet për skuadrat pjesëmarrëse është 331 milionë euro, shuma e njëjtë sa ishte edhe në Euro 2020.

Në fazën e grupeve do të zhvillohen nga tri ndeshje, teksa UEFA sot ka njoftuar që ka miratuar vendimin se të gjitha ekipeve do t’u garantohen nga 9.25 milionë euro. Në rast fitoreje, atëherë kësaj shumë do t’i shtoheshin edhe 1 milion euro, ndërsa për barazim 500 mijë euro.

Skuadrat që sigurojnë kalimin në mesin e 16-të më të mirave do të sigurojnë nga 1.5 milionë euro, ato që arrijnë çerekfinalen do të marrin nga 2.5 milionë euro, ndërsa kualifikimi në gjysmëfinale “paguhet” me 4 milionë euro.

Ekipi që në fund del fitues i EURO-s do të marrë 8 milionë euro dhe nënkampioni 5 milionë euro.

Në rast se ekipi kampion ka fituar të gjitha ndeshjet e grupit, atëherë do të fitojë maksimumi 28.25 milionë euro.

Ndryshe, shorti për ndarjen e grupeve do të bëhet sot, nga ora 18:00.