Tubimet pro Palestinës në Cyrih dhe Gjenevë tërheqin mijëra njerëz

Keystone EPA/MOHAMMED SABER

Rreth 3,000 demonstrues bënë thirrje për një “Gazë të lirë” në Cyrih dhe Gjenevë të shtunën pasdite. Edhe një herë u brohorit thirrja e diskutueshme “Nga lumi në det, Palestina do të jetë e lirë”.

Demonstratat ishin të autorizuara teksa slogani “Nga lumi në det” është etiketuar si qartësisht antisemite nga pala izraelite, pasi i mohon Izraelit dhe banorëve të tij të drejtën për të ekzistuar, shkruan swissinfo.

Një folës u bëri thirrje gjithashtu pjesëmarrësve në Helvetiaplatz të Cyrihut që të bojkotojnë markat “miqësore për Izraelin”, siç është zinxhiri i kafesë Starbucks. Demonstrata e rreth 1000 pjesëmarrësve u ruajt nga një kontigjent i madh policie, përcjell albinfo.ch.

Polemika për autorizimin e demonstrimit

Fakti që qyteti i Cyrihut kishte autorizuar këtë demonstratë çoi në mosmarrëveshje me drejtorin kantonal të sigurisë Mario Fehr në fillim të kësaj jave. Ai e cilësoi autorizimin e qytetit si të pakujdesshëm dhe të rrezikshëm, ndërsa tha se brohoritja e parullave të urrejtjes nuk kishte të bënte me lirinë e shprehjes.

Qeveria e qytetit të Cyrihut mban qëndrimin se nuk i vlerëson kurrë aplikimet për demonstrata sipas përmbajtjes së tyre politike, por vetëm sipas pyetjes nëse siguria dhe ligji mund të garantohen.

Qyteti i Bernës ka zgjedhur një qasje më kufizuese. Ai vendosi këtë javë që nuk do të lejohen më demonstrata të mëdha në qendër të qytetit nga 17 nëntori deri në Krishtlindje.

Në Gjenevë, rreth 2000 njerëz demonstruan në mbështetje të palestinezëve. Flamuj të shumtë palestinezë valuan nëpër rrugë deri në Place des Nations, pas një pankarte që bënte thirrje për “fundin e gjenocidit” në Rripin e Gazës.

Folësit kërkuan që të bëhet presion ndaj autoriteteve federale: “Zvicra ka për detyrë si anëtare e Këshillit të Sigurimit të OKB-së dhe si shtet depozitues i Konventave të Gjenevës të bëjë thirrje për një armëpushim të menjëhershëm”, tha njëri prej tyre. “Cassis, jep dorëheqjen!” këndonte turma.

Në pankartat në demonstratë shkruhej: “Cassis si bashkëpunëtor”, “Berna duhet të ndalojë bashkëpunimin ushtarak me Izraelin”, “Palestinë e lirë, Gaza e lirë”, “4500 fëmijë të vrarë në 33 ditë”, “Palestinë, nuk ka paqe pa drejtësi”, “Stop masakrës së popullit palestinez” dhe “Izraeli si vrasës, Zvicra si bashkëpunëtor”.