Për 9-të muaj, kjo linjë ajrore zvicerane fitoi 616 milionë franga

Linja ajrore SWISS rrit “arbitrarisht” çmimet, thotë grupi i konsumatorëve

Fondacioni për Mbrojtjen e Konsumatorit po akuzon linjën ajrore kombëtare të Zvicrës për rritjen ‘arbitrare’ të çmimeve të biletave në ‘rrugët monopole’ të SWISS – pra, linjat që nuk shërbehen nga transportues të tjerë, për shembull ajo midis Cyrihut dhe Gjenevës, përcjell albinfo.ch.

Në fakt, Fondacioni tha se SWISS ka pasur një vit “financiarisht të suksesshëm” deri më tani, pikërisht sepse rriti çmimet e saj.

Linja ajrore postoi një fitim prej afro 616 milionë frangash në nëntë muajt e parë të 2023-ës, më i larti ndonjëherë në historinë e saj 20-vjeçare.

Si përgjigje, SWISS ka konfirmuar se çmimet e saj janë “aktualisht më të larta se para pandemisë”.

“Ne presim që biletat e fluturimit në përgjithësi të bëhen më të shtrenjta, për shkak të angazhimit tonë për qëndrueshmëri më të madhe, si dhe për shkak të investimeve dhe kostove të larta”, tha zëdhënësi i kompanisë.

 

 

---