Për herë të parë nga 1910, popullsia e Vjenës kalon përsëri shifrën e dy milionëve

Vienna, Pixabay

Popullsia e kryeqytetit të Austrisë, Vjena, ka tejkaluar shifrën e dy milionëve, pjesërisht falë 19,500 banorëve të rinj që janë shpërngulur në qytet këtë vit, duke arritur kështu totalin prej 2.08 milionë.

Nuk është një rekord i të gjitha kohëve, por është hera e parë që qyteti ka një popullsi mbi dy milionë që nga viti 1910, kur arriti nivelin më të lartë historik prej 2.1 milionë.

Vjena arriti një pikë të ulët që nga fillimi i viteve 1900 në fund të viteve 1990, ku kishte pak më pak se 1.5 milioë dhe është rritur që atëherë, sipas TheLocal.at.

Kryeqyteti austriak është tani qyteti i pestë më i madh në Bashkimin Evropian dhe qyteti i dytë më i madh në botën gjermanishtfolëse, pas Berlinit, përcjell albinfo.

Statistikat e fundit tregojnë se 39 për qind e njerëzve që jetojnë në Vjenë kanë lindur jashtë vendit. Emigrantët e rinj të huaj në Vjenë po e bëjnë qytetin më të ri, me një moshë mesatare në rënie graduale, e cila tani është 41.2 vjeç.

Komunitetet më të mëdha të huaja në Vjenë vijnë me origjinë nga Evropa Lindore, ish-Jugosllavia, Turqia dhe vendet e fundit të refugjatëve, si Siria, Iraku, Afganistani, Irani dhe Ukraina.

Lagjet me më shumë banorë të huaj në Vjenë përfshijnë Rudolfsheim-Fünfhaus, Brigittenau dhe Favoriten, ku mbi 50 për qind e banorëve në secilin prej këtyre rretheve kanë lindur jashtë Austrisë.