Sveçla tregon cili ishte plani i rrezikshëm i terroristëve në veri

Ministri i Brendshëm i Kosovës, Xhelal Sveçla ka dolur sërish rreth sulmit terrorist të 24 shtatorit në Banjskë të Zveçanit.

Ai tha se aty morën pjesë rreth 90 terroristë synimi i të cilëve ishte që të realizohej një korridor mes Serbisë dhe dy komunave në veri të Kosovës, Mitrovicës së Veriut dhe Zveçanit.

“Tashmë kemi shumë informata që zbardhin skenarin e Serbisë më 24 shtator. Pra, kishte diku rreth 90 terroristë, të cilët u futën me armatime të rënda në Republikën e Kosovës, planifikuan të realizojnë korridor mes Serbisë dhe dy komunave: Mitrovicës së Veriut dhe Zveçanit”, tha Sveçla.

Sipas ministrit të brendshëm kosovar, plani përfshinte edhe elemente tjera të rrezikshme.

“Ky plan përfshinte edhe një element jashtëzakonisht të rrezikshëm, e ai ishte se disa nga veturat, rreth 30 sosh që ishin në Kosovë, kishin stikersa me shenjën e KFOR-it. Këta kishin edhe uniforma të KFOR-it italian dhe kishin diku rreth 23 -24 armë me silenciatorë, ishin të gatshëm të maskoheshin si pjesëtarë të KFOR-it e t’i ekzekutonin pjesëtrët e policisë së Kosovës, me ç’rast tensionet do të rriteshin në pikë ku realisht nuk do të dihej kush me kënd po shtie. Në të njëjtën kohë kishin numër të madh të uniformave, pajisjeve dhe armëve, numër më të madh sesa që ishin vetë. Jep indikacion se ishin përgatitur një pjesë të armatimeve, uniformave t’ia jepnin personave që ishin tashmë në Kosovë. Numri i tyre do të dyfishohej apo trefishohej”, theksoi Sveçla.