Asnjë fushatë e Këshillit Federal për kursimin e energjisë këtë vit

(KEYSTONE/Salvatore Di Nolfi)

Një vit më parë, Këshilli Federal nxori rekomandimet e tij për kursimin e energjisë, ndërsa këtë vit Konfederata nuk e konsideroi të nevojshme rinisjen e kësaj fushate.

Pas këtij vendimi qëndrojnë disa faktorë, shkruan RTS.

Zvicra është më e përgatitur se vjeshtën e kaluar, flota bërthamore franceze po ecën më mirë, më shumë reaktorë janë në funksion, rezervuarët janë në një nivel të mirë dhe po ashtu edhe rezervat e gazit.

Gazi është gjithashtu më i lehtë për t’u importuar sesa vjeshtën e kaluar, bën të ditur inxhinieri i energjisë, Marc Müller.

“Ne u furnizuam masivisht nga Rusia, drejtpërdrejt, me gaz të lirë,” shpjegon ai, përcjell albinfo.ch.

Për shkak të luftës në Ukrainë, Zvicrës iu desh të përshtatte strategjinë e saj dhe t’u drejtohej furnizuesve të tjerë.

“Ishte e nevojshme të krijohej infrastruktura, veçanërisht portet dhe cisternat LNG, për të qenë në gjendje të importonin gaz të lëngshëm nga deti në sasi shumë të mëdha”, ka thënë ai.

Sipas tij, Zvicra ishte në gjendje të “ndryshonte plotësisht furnizuesit” dhe “të merrte furnizimet e saj në veçanti nga Katari dhe Shtetet e Bashkuara të Amerikës”.

Megjithatë, ky vendim për të mos rinisur një fushatë ndërgjegjësimi nuk i bind të gjithë. Këshilltari Kombëtar Bastien Girod (Green/ZH), u shpreh se do të kishte dashur të shihte inkurajim për të kursyer energji përsëri këtë vit ndërsa shprehu keqardhjen që Konfederata nuk ka një vizion më afatgjatë.

Nga ana tjetër, për këshilltarin kombëtar, Jacques Bourgeois (PLR/FR), rritja e ndërgjegjësimit të popullatës tani do të ishte “një e shtënë në errësirë”.

“Aktualisht, me temperaturat ende shumë të larta që po përjetojmë, nuk do të kemi ngrohje në ndërtesat tona. Mendoj se kur ka konsum të lartë energjie, ia vlen të ndërgjegjësohet”, thotë ai.

Rreziku i mungesës mund të rishfaqet në rast të ndërprerjeve në tregun e gazit, nëse centralet bërthamore franceze dështojnë ose edhe në rast të një dimri veçanërisht të ashpër.