Berlini thotë se është ‘model’ vdekja e Prigozhin-it

Keystone (AP Photo, File)

Kryediplomatja gjermane, Annalena Baerbock, ka shprehur dyshimet se Rusia është përfshirë në vdekjen e supozuar të shefit të Wagner, Yevgeny Prigozhin, duke iu referuar një modeli të “vdekjeve të paqarta në Rusi”.

Prigozhin ishte në një avion biznesi që u rrëzua në Rusi të mërkurën, thanë mediat e lidhura me Wagner. Autoritetet ruse të aviacionit thanë gjithashtu se Prigozhin ishte në fluturim, me mediat shtetërore që thanë se të gjithë njerëzit në bord u vranë, shkruan DW.

“Nuk është rastësi që bota shikon menjëherë Kremlinin kur një ish-i besuar i Putinit, i turpëruar, befas, fjalë për fjalë bie nga qielli dy muaj pasi ai tentoi një kryengritje”, tha Annalena Baerbock, duke iu referuar presidentit rus, Vladimir Putin.

Duke folur gjatë një konference për shtyp me ministrin e Jashtëm Kirgistan, Baerbock renditi mënyra të ndryshme se si kundërshtarët e Putinit kanë vdekur në të kaluarën.

“Ne e dimë këtë model në Rusinë e Putinit: vdekje, vetëvrasje të dyshimta, rënie nga dritaret, të gjitha të cilat mbeten të paqarta – që nënvizon një sistem pushteti diktatorial që është ndërtuar mbi dhunën”, përcjell albinfo.ch.

Wagner ishte shumë i përfshirë në luftën e Rusisë në Ukrainë përpara rebelimit jetëshkurtër të Prigozhin në qershor.

Grupi mercenar është gjithashtu i pranishëm në konflikte të ndryshme aktive në Afrikë, ku blloku i ekonomive në zhvillim, BRICS, anëtare e të cilit është Rusia, njoftoi të enjten se ftonte anëtarë të rinj, duke përfshirë dy vende afrikane, shkruan DW.