Rritje e papunësisë në Gjermani

pixabay

Të dhënat zyrtare në Gjermani tregojnë se papunësia u rrit papritur gjatë qershorit.

Kjo është shenja e fundit e dobësisë në ekonominë më të madhe të Evropës.

Shkalla e papunësisë u rrit deri në 5.7%, pasi ishte e qëndrueshme në 5.6% që nga marsi, shkruan The Local.

Analistët e anketuar nga FactSet kishin pritur që norma të mbetej e pandryshuar. Gjermania “po ndjente efektet e kushteve më të vështira ekonomike në tregun e punës”, tha shefi i BA, Andrea Nahles, në një deklaratë.

Numri i njerëzve të papunë u rrit për 11,000 nga muaji në muaj dhe arriti në 2.55 milionë, përcjell albinfo.ch.

Edhe pa marrë parasysh ardhjen e refugjatëve ukrainas që kërkojnë punë, shkalla e papunësisë në Gjermani do të ishte rritur këtë muaj, shtoi agjencia.

Gjermania ra në një recesion teknik në fillim të vitit, pas dy tremujorësh radhazi të tkurrjes, pasi inflacioni i nxitur nga rritja e kostove të energjisë dhe normat më të larta të interesit e bënë dëmin e tyre.

Konsumatorët kanë vazhduar të frenojnë shpenzimet e tyre në muajt e fundit, ndërkohë që kërkesa për kreditë e korporatave dhe familjeve është ulur, pasi rritja e normave të Bankës Qendrore Evropiane e bën huamarrjen më të shtrenjtë, shkruan The Local.

Institutet kryesore ekonomike tani presin që ekonomia gjermane të tkurret me 0.2 deri në 0.4% në vitin 2023.

Nëse siguria e punës bëhet një shqetësim në rritje për punëtorët, ajo mund të largojë një pjesë të presionit nga kërkesat për paga, tha ekonomisti i bankës ING, Carsten Brzeski, përcjell albinfo.ch.