Hapësira ajrore e Gjermanisë – qendër e manovrave të NATO-s

Bundeswehr

Gjermania është qendra logjistike e manovrave më të mëdha në historinë e NATO-s.

Për këtë ka disa arsye, shkruan DW. Fillimisht për shkak të vendndodhjes së saj gjeografike, infrastrukturës ushtarake që ka që prej Luftës së Ftohtë.

Mbi 10 mijë ushtarë të NATO-s, nga 12 deri më 23 qershor marrin pjesë në këtë manovër, ku do të jenë të stacionuar në gjashtë aeroporte ushtarake gjermane me mbi 240 avionë nga 25. Veç shteteve të NATO-s, merr pjesë edhe Suedia dhe si vëzhguese Japonia, përcjell albinfo.ch.

Aviacioni luftarak gjerman është i pranishëm me 70 avionë si dhe me helikopterë. Gjermania është vendi i vetëm që merr pjesë edhe me helikopterë në manovër.

SHBA do të dërgojnë 100 avionë, F-15, F-16 dhe avionët më modernë që kanë, F-35. SHBA kanë në Gjermani infrastrukturën më të gjerë ushtarake në Evropë.

Avionët F-35 do të stacionohen për manovrën në njërën nga bazat amerikane në Gjermani, në Spangdahlem, në landin e Rheinland-Pfalzit, shkruan DW.

Me këtë manovër NATO synon të demonstrojë që në rast krize, avionët e saj mund të mbrojnë hapësirën ajrore evropiane. Plani për të mbajtur stërvitjen “Air Defender”, e ka fillesën që në vitin 2018. Por manovra merr kuptim të ri për shkak të luftës në Ukrainë, përcjell albinfo.ch.