Ka plagosur me thikë kunatin, kosovari apelon kundër dëbimit nga Zvicra

I akuzuari pranon veprën (plagosjen e kunatit) dhe pendohet. Por ai mohon të ketë pasur synim për të vrarë

Një grindje familjare në prill 2019 përfundoi me përdorimin e një thike xhepi dhe me një krah të thyer. Autori 47-vjeçar është dënuar në shkurt të vitit 2022 nga Gjykata Penale e Luzernit me gjashtë vjet e tre muaj burgim, plus dhjetë vjet dëbim nga Zvicra për veprën penale tentativë vrasjeje, transmeton albinfo.ch. Kundër kësaj ai kishte ushtruar të drejtën e ankesës, në Gjykatën më të lartë, atë kantonale.

Kështu, Gjykata Kantonale ka shqyrtuar rastin të hënën. Në lëndën e procesit bëhet e ditur se i akuzuari kosovar ka jetuar këtu për 23 vjet, ka grua dhe vajza, punë të përhershme dhe nuk ka bërë delikte të tjera para dhe pas krimit të përmendur. Përballë gjykatës është ulur një burrë thellësisht i enduar, i cili që në fillim thotë: “Jo një herë, por njëqind herë kërkoj falje”.

Gjatë procesit të zhvilluar të hënën, gjyqtari kërkon të dijë nga i akuzuari përse kishte sulmuar kunatin e tij. Ai nuk ka përgjigje dhe thotë: “Më kujtohet ajo ditë, shkruan Luzerner Zeitung. Më vjen shumë keq, nuk ishte e nevojshme që diçka e tillë të ndodhte”.

Ndërsa, i pyetur se pse i kishte paguar kunatit shumën e dëmshpërblimit, ai tha: “Atë që të ngarkon, duhet ta paguash”. Dhe çfarë do të thotë për ju dëbimi nga vendi? “Për mua nuk ka asgjë më të keqe se të largohem nga familja dhe Zvicra”.

Në pledoajenë e saj, avokatja jep njohuri të mëtejshme për sjelljen e kosovarit. Me deklaratat e tij kontradiktore ka dashur të tregojë një version më të favorshëm për të. Ai kishte frikë nga dëbimi dhe humbja e familjes së tij, transmeton albinfo.ch. Ai kurrë nuk kishte ndërmend të kryente vrasje, vepra u bë në gjendje afekti.

Fakti që i akuzuari ka qenë “burrë shtëpie” për më shumë se dhjetë vjet dhe kështu i ka mundësuar gruas së tij të bëjë karrierë, nuk është vlerësuar nga të afërmit meshkuj, por përkundrazi, është kritikuar.

Sipas prokurorisë, viktima gjatë përleshjes ka përdorur duart dhe këmbët për t’u mbrojtur nga sulmuesi. Mbrojtja thekson: “Nuk janë konstatuar shenja të prerjeve në duar”. Lëndimet e tjera u shëruan shpejt dhe pa dëmtime të përhershme. Mbrojtësja vazhdon: “Nuk dua ta minimizoj aktin, dua ta klasifikoj në mënyrë të arsyeshme”. Ajo kërkon 14 muaj burg dhe heqje dorë nga masa e dëbimit të klientit të saj nga Zvicra.

Por prokurori i qëndron vendimit të gjykatës penale: “I akuzuari ka goditur me thikë viktimën pa paralajmërim, pra, goditja ka qenë e qëllimshme”. Nuk mund të identifikohej një motiv tjetër, i kuptueshëm i krimit, përcjell albinfo.ch. Pasojë e sulmit me thikë ishte thyerja e krahut, përndryshe do të kishte vazhduar.

Aktgjykimi do t’u dërgohet palëve.

---