Potencialet turistike të Kosovës promovohen në Izrael

Tre operatorë turistikë nga Kosova: Outdoor Kosovo, Balkan Destination dhe Balkan Natural Adventure janë duke i promovuar potencialet turistike të Kosovës në panairin e turizmit “International Mediterranean Tourism Market- IMTM 2023”, që është duke u mbajtur në Tel Aviv të Izraelit, më 14 dhe 15 shkurt 2023, përcjell albinfo.ch.

Kosova në këtë panair ka një shtand me hapësirë prej 12 m2, i cili gjendet në Sallën 1, nr. 113 që është siguruar nga MINT/KIESA.

Shtandi i Kosovës është vizituar nga znj. Ines Demiri, ambasadore e Kosovës në Jerusalem dhe znj. Tamar Ziv, ambasadore e Izraelit në Kosovë.

Pjesëmarrja në IMTM është një mundësi e mirë për promovimin e atraksioneve turistike që ofron Kosova, duke përfshirë vendet historike, ngjarjet kulturore, turizmin e aventurës dhe gastronominë.

Krahas promovimit të potencialeve turistike, operatorët nga Kosova, po e përcjellin në këtë panair edhe trendin ndërkombëtar të industrisë së turizmit.

Brenda dy dite, panairi IMTM vizitohet nga 30 mijë vizitorë. Aty marrin pjesë rreth 2900 ekspozues nga 52 shtete të botës.

Pjesëmarrja në panairin IMTM u mundësua nga MINT/KIESA, në bashkëpunim me PPSE.