Vazhdon promovimi i produkteve shqiptare në panairin e Gjermanisë

Panairi është i hapur deri më 17 shkurt 2023.

Produktet e shtatë kompanive nga Kosova promovohen në Gjermani.

Kompanitë nga Kosova: Organic Herb, Agroproduct, Agro-Florentina, A-D-E Group, Fungo, Hit-Flores dhe Dhemetra JV L.L.C, nga data 14 shkurt po i promovojnë produktet e tyre në panairin e ushqimeve organike “BIOFACH 2023”, që po mbahet në Nuremberg të Gjermanisë, përcjell albinfo.ch.

Shtandi ku po ekspozohen produktet e shtatë kompanive nga Kosova, si: bimë mjekuese aromatike, fruta mali të ngrira dhe të thata, kërpudha, dredhëza dhe produkte organike të tjera të sektorit të bujqësisë, është siguruar nga Ministria e Industrisë, Ndërmarrësisë dhe Tregtisë (MINT), përkatësisht Agjencia për Investime dhe Përkrahjen e Ndërmarrjeve në Kosovë (KIESA).

Në këtë panair përfaqësuesit e kompanive tona po zhvillojnë kontakte me pjesëmarrës dhe blerës potencialë me qëllim të krijimit të kontakteve të bashkëpunimit si dhe të rritjes së prodhimit dhe eksportit.

Shtandi i Kosovës në këtë panair ka një hapësirë prej 81 m2 dhe gjendet në Hall 4-449.

Panairi është i hapur deri më 17 shkurt 2023.

---