Bileta 49 euro për Gjermaninë vjen përfundimisht

Kështu tha kancelari gjerman, Olaf Scholz. Megjithatë, ai nuk dha detaje të sakta për datën e fillimit.

“Deutschlandticket”, bileta e paralajmëruar tash sa muaj do të hyjë në fuqi përfundimisht, transmeton albinfo.ch. Kjo është një biletë treni që do të vlejë në mbarë Gjermaninë dhe do të kushtojë 49 euro në muaj. Qeveria federale dhe shtetet federale do të mbulojnë secili gjysmën përkatëse të kostove.

Kështu tha kancelari Olaf Scholz, shkruan srf.ch.

Ai shpjegoi më tej se ata që janë përgjegjës për biletën në fjalë, si në shtetet federale ashtu dhe në kompanitë e transportit tani mund të ecin përpara. Megjithatë, ai nuk dha detaje të sakta për datën e fillimit.

“Deutschlandticket” synohet të lidhet me biletën prej 9 eurosh, e cila ishte e disponueshme gjatë verës. Ajo ishte vlerësuar si sukses i plotë, veç tjerash për faktin se tërhiqte pasagjerët në transportin publik, duke lehtësuar transportin automobilistik, privat.

Bileta e re duhet të jetë gjithashtu e vlefshme për autobusët dhe trenat në transportin lokal e regjional në të gjithë Gjermaninë.

---