Lajme
Kritika nga Gjermania: “Zvicra po shkel Shengenin, duke sjellë refugjatët te ne”
Andrea Lindholz, nënkryetare e grupit parlamentar CDU/CSU në Bundestag: SBB po promovon hyrjen e paligjshme në Gjermani
Rreth një mijë refugjatë arrijnë në kufirin zviceran me Austrinë në Buchs (SG) çdo javë – kryesisht të rinj afganë që nuk aplikojnë për azil, por duan që, përmes Zvicrës, të shkojnë në Francë ose Gjermani.
“Ne lejojmë zyrtarisht udhëtimin e mëtejshëm,” citon “NZZ am Sonntag” deklarimet nga policia e kantonit St. Gallen.
Por, kjo praktikë tani po shkakton kritika të ashpra nga Gjermania: “Nëse këto raporte janë të sakta, Zvicra thjesht po i lejon ata të kalojnë” citohet në gazetë Andrea Lindholz, nënkryetare e grupit parlamentar CDU/CSU në Bundestag, transmeton albinfo.ch. “Egoizmi kombëtar (i Zvicrës) po dëmton zonën Shengen”.
Një zëdhënës i Zyrës Federale Gjermane për Migracionin ka thënë gjithashtu se kjo ishte një shkelje e Marrëveshjes së Dublinit: “Situata ligjore është e qartë”, sipas tij.
Ndërkaq, Lindholz po bën thirrje për një ndërhyrje në Këshillin Federal të Zvicrës sepse gjithnjë e më shumë emigrantë po udhëtojnë drejt Gjermanisë përmes Zvicrës. Sipas saj, Zvicra duhet të përmbushë detyrimet e saj si anëtare e zonës Shengen dhe të ndërmarrë veprime kundër migrimit të paligjshëm.
Sekretariati Shtetëror për Migracionin (SEM) kundërshton kritikat nga Gjermania. Sipas SEM, as Marrëveshja e Dublinit dhe as ligjet e tjera janë duke u shkelur në këtë mënyrë.
Emisioni “Rundschau” i transmetuesit publik të Zvicrës, SRF, kishte treguar në fillim të tetorit se SBB kishte siguruar vagona specialë për migrantët që vinin nga Austria në Buchs në kantonin e St. Gallen për udhëtimin e mëtejshëm përmes Cyrihut në Bazel. Në lidhje me këtë, Lindholz thotë se SBB po promovon kështu hyrjen e paligjshme në Gjermani.
Ndërsa SEM nuk sheh bazë ligjore për ndalimin e njerëzve. Dhe sipas tij, përpara se të përfundojë një procedurë e Dublinit, e cila synon të përcaktojë se cili vend është përgjegjës për kryerjen e procedurës së azilit, refugjatët tashmë kanë udhëtuar më tutje. “Procedura e Dublinit nuk mund të kryhet për njerëzit që nuk janë më të pranishëm këtu”, thotë zëdhënësi i Sekretariatit Shtetëror për Migracion.
Profesoresha e të drejtës së migracionit, Sarah Progin-Theuerkauf, e përshkruan në Rundschau përcjelljen e emigrantëve si “shkelje të ligjit dhe që nuk është në përputhje me Marrëveshjen e Dublinit”, përcjell albinfo.ch. Sepse procedura e azilit duhet të kryhet në vendin në të cilin refugjati ka hyrë për herë të parë.
Një tjetër profesor i të drejtës së migracionit, Alberto Achermann, i sheh gjërat ndryshe: “Dublini hyn në lojë vetëm kur një person aplikon për azil”, ka thënë ai për “NZZ am Sonntag”.
Emigrantët që mbërrijnë në Buchs zakonisht nuk e bëjnë këtë.
Të ngjashme
Të tjera nga Lajme
E-Diaspora
-
Gjuha shqipe në Zvicër, tema qendrore e numrit më të ri të revistës albinfo.ch Numri më i ri i revistës albinfo.ch, i cili nga sot është në duart e lexuesve,...
-
Itali
Arrestohet shqiptari në Itali, kishte mbi 1 kg kokainë në makinë
-
Panairi Gjergj Kastrioti Skënderbeu, bashkon më shumë se 100 shoqata në Nju-Jork
-
Një shqiptaro-zvicerane ambicioze, në Kancelarinë Federale të Zvicrës
-
Thun
Jehon kënga e vallja shqipe në sheshin e qytetit Thun
Jeta në Austri
-
Një përmbledhje e lajmeve më të fundit në Austri Austria sheh rritje të papunësisë ndërsa ekonomia dobësohet, foshnja e vogël lëndohet pas rënies nga dritarja...
-
A mund të paguani taksat tuaja austriake duke përdorur një llogari bankare të huaj?
-
Pse Austria renditet kaq keq në indeksin për lirinë e shtypit?
-
Nomadët digjitalë: Kush mund të punojë në distancë në Austri?
-
Lajmet kryesore të Austrisë për këtë të enjte