PIagosen dy kosovarë në Gjermani, njëri në gjendje kritike

33-vjeçari shqiptar plagos shefin dhe kolegun, Policia: Nuk patën asnjë debat, ngjarja ndodhi papritur

Një ngjarje e rëndë ka ndodhur në Gjermani, ku një shqiptar ka plagosur me thikë dy persona, përcjell albinfo.ch.

Raportohet se një shqiptar është arrestuar për tentativë vrasjeje. Sipas asaj që shkruajnë mediat, 33-vjeçari, identiteti i të cilit nuk bëhet i ditur, sulmoi me thikë shefin dhe një koleg të tij. Mësohet se i riu punonte si bojaxhi, transmeton albinfo.ch.

Të tre kishin shkuar së bashku në një furrë buke për të blerë diçka për të ngrënë në mëngjes. Por, në moment e sipër, shqiptari ka nxjerrë një thikë kuzhine. Si pasojë e goditjeve, kanë mbetur të lënduar rëndë 2 personat. Punëtori i plagosur ndodhet në gjendje kritike për jetën.

“Gjendja e tij është ende shumë kritike”, tha Stephan Beer, shef policie.

Sipas asaj që raporton policia, shqiptari e ka mbajtur me vete thikën 20 centimetra të gjatë përgjatë gjithë rrugës deri në furrën e bukës në Nymphenburg.

“Ngjarja ndodhi papritur”, shpjegojnë hetuesit. Mes 3 personave nuk ka pasur asnjë debat atë mëngjes.

Sipas policisë, 2 të plagosurit, shefi 50-vjeçar dhe bojaxhiu tjetër 28 vjeç, ishin me origjinë kosovare dhe serbe. Ata kanë marrë goditje në qafë, gjoks dhe shpinë.

Tashmë u takon autoriteteve që të sqarojnë rrethanat e kësaj ngjarje të rëndë. Po ashtu, dyshimet janë që shqiptari të vuajë nga probleme të shëndetit mendor. Kjo është mbështetur nga vendimi i gjyqtarit që të dielën pasdite, i cili vendosi që ta çojë shqiptarin në një klinikë të specializuar për shëndetin mendor./Albinfo.ch

---