Shumë shqiptarë ikin nga Greqia në shtetet e pasura

Të ardhurat më të larta, siguria, janë ndër arsyet më të mëdha.

Raportohet se shumë shqiptarë me leje qëndrimi po largohen nga Greqia për në vendet më të pasura, tregojnë të dhënat e publikuara në gusht nga Ministria Greke për Migracionin dhe Azilin, përcjell albinfo.ch.

Referuar të dhënave të nxjerra nga ministria në gusht 2021, 422.954 emigrantë nga Shqipëria kishin një leje qëndrimi të vlefshme greke. Një shifër që përbën 63,07 për qind të të huajve rezidentë të ligjshëm në Greqi. Të dhenat tregojnë se në vitin 2022 janë 291 868 shtetas shqiptarë me leje qëndrimi të vlefshme në Greqi, shkruan Greek Reporter.

Sipas kësaj medie, rënia e numrit të emigrantëve shqiptarë në Greqi lidhet jo vetëm me procedurat më të rrepta për dhënien e lejeve të qëndrimit dhe marrjen e nënshtetësisë greke, por edhe me një lëvizje dinamike të punëtorëve shqiptarë dhe familjeve të tyre drejt vendeve të tjera evropiane me kushte dhe perspektiva më të mira.

Një numër i madh i shqiptarëve që jetonin në Greqi kanë emigruar në Evropën Veriore dhe në Britaninë e Madhe, pasi kanë hasur vështirësi në Greqi përsa i përket punësimit dhe rritjes së çmimeve.

Të dhënat e vitit 2022 lëshuar nga ministria përfshijnë 13.329 shtetas shqiptarë, të cilët identifikohen me emërtimin e veçantë “homogjenë” në letërnjoftimet e tyre.  Kjo i identifikonata zyrtarisht si individë të minoritetit grek nga Shqipëria.

Në total, mund të ketë më shumë se gjysmë milioni individë me origjinë shqiptare në Greqi, të cilët së bashku me fëmijët e tyre kanë marrë nënshtetësinë greke gjatë viteve.

Italia dhe Greqia ende presin numrin më të madh të shqiptarëve që jetojnë jashtë, ku numri është në rritje në Itali, ndërsa në Greqi po  zvogëlohet për shkak të vështirësive ekonomike.

Emigrantët shqiptarë integrohen më mirë në Greqi se të huajt e tjerë

Shqiptarët kanë një histori të gjatë emigrimi dhe integrimi në Greqi. Pavarësisht problemeve sociale dhe politike të përjetuara nga vala e emigracionit në vitet 1980 dhe 1990, shqiptarët janë integruar më mirë në Greqi se sa të huajt e tjerë.

---