Publikohen pamjet e Neptunit

Teleskopi James Webb dërgoi foton më të re të Neptunit

Neptuni iu shtua listës në viti 1989 por unazat e tij nuk u konfirmuan deri në vitin 2021.

Tashmë, teleskopi hapësinor James Webb ka kapur imazhin më të ri të Neptunit dhe unazave të tij mahnitëse: “Është thjesht absolutisht e jashtëzakonshme”, shkruan agjencia hapësinore NASA.

Teleskopi i famshëm i James Webb e ka kthyer shikimin e tij nga universi i thellë drejt Sistemit tonë Diellor, duke kapur një imazh të një Neptuni të ndritshëm dhe unazave të tij delikate në detaje që nuk janë parë në dekada, tha NASA këtë të mërkurë.

“Ky nuk është yll. Është hëna e madhe dhe e pazakontë e Neptunit – Hëna Triton! Për shkak se Tritoni është i mbuluar me azot të ngrirë dhe të kondensuar – praktikisht me akull – ai reflekton 70% të dritës së diellit që e godet atë – duke e bërë atë të duket shumë i ndritshëm për teleskopin Webb. 6 nga hënat e tjera të Neptunit (të etiketuara) shihen gjithashtu këtu,” – shkruan NASA në raportin e saj të djeshëm.

Hera e fundit që astronomët patën një pamje kaq të qartë të planetit më të largët nga dielli ishte kur Voyager 2 i NASA-s u bë sonda e parë dhe e vetme hapësinore që fluturoi pranë gjigantit të akullit për vetëm disa orë në vitin 1989.

Tani aftësia e paprecedentë e fotografimit me dritë infra të kuqe të Webb-it ka dhënë një pamje të re të atmosferës së Neptunit, tha Mark McCaughrean, një këshilltar i lartë për shkencën dhe eksplorimin në Agjencinë Evropiane të Hapësirës.

Teleskopi “heq gjithë atë shkëlqim dhe sfond” në mënyrë që “ne mund të fillojmë të ngacmojmë përbërjen atmosferike” të planetit, tha për AFP McCaughrean, i cili ka punuar në projektin Webb për më shumë se 20 vjet.

Neptuni shfaqet në ngjyrë blu të thellë në imazhet e mëparshme të marra nga Teleskopi Hapësinor Hubble për shkak të metanit në atmosferën e tij. Megjithatë, gjatësitë e valëve infra të kuqe të kapura nga imazheri kryesor i Webb-it NIRCam e tregojnë planetin si një ngjyrë të argjend në të bardhë, me re të akullta që shtrihen nëpër sipërfaqe.

“Unazat janë më reflektuese nën dritën infra të kuqe,” tha McCaughrean, “kështu që ato janë shumë më të lehta për t’u parë.”

Imazhi gjithashtu tregon një “shkëlqim intrigues” pranë majës së Neptunit, tha NASA. Për shkak se planeti është anuar nga Toka dhe i duhen 164 vjet për t’u rrotulluar rreth Diellit, astronomët ende nuk e kanë parë mirë polin e tij verior.

Webb gjithashtu vuri re 7 nga 14 hënat e njohura të Neptunit.

Ndërsa astronomët eksplorojnë universin duke kërkuar për planetë të tjerë si planeti ynë, ata kanë zbuluar se gjigantët e akullit si Neptuni dhe Urani janë më të zakonshmit në Rrugën e Qumështit.

Që nga korriku, Webb është teleskopi hapësinor më i fuqishëm i ndërtuar ndonjëherë dhe tashmë ka nxjerrë një sërë të dhënash të pakonsideruara më parë.

Hulumtimet e bazuara në vëzhgimet e tij për Neptunin dhe Tritonin priten të dalin vitin e ardhshëm/euronews

 

 

---