Zvicër: Vdekshmëria e tepërt në vitin 2022 vë në mëdyshje autoritetet shëndetësore

Keystone

Që nga fillimi i vitit, Zvicra ka regjistruar 3,000 vdekje më shumë se normalja gjatë kësaj periudhe, dhe gati dyfishi i shifrës për të njëjtën periudhë të vitit 2021, sipas të dhënave të publikuara të enjten nga Enti Federal i Statistikave, përcjell albinfo.ch.

Zyrtarët shëndetësorë janë të hutuar nga ky zhvillim, por ekspertët besojnë se Covid-i ende i zgjatur dhe vera jashtëzakonisht e nxehtë janë fajtorë për vdekshmërinë e tepërt.

“Është pikërisht kombinimi i dy faktorëve që mund të jetë fatal”, tha Christian Althaus, epidemiolog në Universitetin e Bernës.

“Studimet kanë treguar se një infeksion Covid rrit masivisht rrezikun e sëmundjeve kardiovaskulare. Prandaj, njerëzit në fjalë janë gjithashtu më të prekshëm ndaj efekteve të valës së të nxehtit,” shtoi ai.

Një tjetër epidemiolog, Martin Röösli, pajtohet: “Nga këndvështrimi im, është shumë e mundur që ish-pacientët Covid ta tolerojnë më pak nxehtësinë”.