Pandemia ka shkatërruar 33.000 vende pune në Zvicër gjatë vitit 2020

Vetëm në gastronomi, qenë humbur më shumë se 15,000 vende pune për shkak të pandemisë së koronavirusit

Për herë të parë që nga viti 2011, numri i kompanive dhe punonjësve në Zvicër kishte shënuar rënie në vitin 2020. Vetëm në gastronomi, qenë humbur më shumë se 15,000 vende pune për shkak të pandemisë së koronavirusit. Kjo korrespondon me një rënie prej gati dhjetë për qind.

Në fund të vitit 2020, Zvicra kishte gjithsej rreth 617,000 kompani dhe pothuajse 5.3 milionë punonjës, sipas statistikave të strukturës së kompanisë (Statent) nga Zyra Federale e Statistikave (BFS), transmeton albinfo.ch. Sipas Statent, kjo është rreth 900 kompani dhe 33,000 vende pune më pak se një vit më parë, që korrespondon me një rënie prej 0.1, respektivisht 0.6 për qind.

Siç thekson BFS, janë marrë parasysh vetëm marrëdhëniet e punës që janë ndërprerë, në mënyrë që puna me kohë të shkurtër apo ndalimet e përkohshme të ushtrimit të mos falsifikojnë statistikat.

Megjithatë, edhe në këtë pikë janë prekur veçanërisht ata sektorë që u prekën më shumë nga pandemia, shkruan srf.ch. Pra, jo të gjithë sektorët e ekonomisë u prekën sa i përket humbjes së vendeve të punës. Kërkimi (hulumtimet shkencore) dhe – çuditërisht – sektori i kujdesit shëndetësor kanë dalë fitues të krizës. Në këtë të fundit, BFS kishte identifikuar madje rreth 12,500 vende pune më shumë në fund të vitit 2020 sesa në vitin e kaluar (+3 për qind).

Pak më shumë se 2000 vende pune u shtuan në hulumtim (+8.3 për qind).

---