Nënë e fëmijë humbin jetën nga rrëzimi i trungut të pemës

Në pjesën e sipërme të faqes së shkëmbit, një trung peme është shkëputur dhe ka rënë në rrugë, ku ka goditur dy personat

Një grua 42-vjeçare dhe djali i saj gjashtë-vjeçar kanë marrë lëndime vdekjeprurëse nga një trung peme i rrëzuar në Alte Badstrasse  në Pfäfers, në Kantonin St. Gallen, transmeton albinfo.ch. Gruaja po udhëtonte me djalin e saj dhe njerëz të tjerë në rrugën me zhavorr nga Bad Ragaz-i në drejtim të Grykës së Taminës.

Rruga kufizohet nga të dy anët me një shkëmb thuajse vertikal dhe një përrua.

Në pjesën e sipërme të faqes së shkëmbit, një trung peme është shkëputur dhe ka rënë në rrugë, ku ka goditur dy personat nga kantoni Appenzell-Ausserrhoden.

Ekipet e shpëtimit dhe mjeku i urgjencës kanë arritur vetëm të konstatojnë vdekjen e dy personave, shkruan srf.ch. Është thirrur ndihma e parë psikologjike për t’u kujdesur për të afërmit.

Alte Badstrasse është një rrugë e rrafshët me zhavorr që të çon nga Bad Ragaz në Grykën Tamina. Qindra njerëz e përdorin shtegun për shëtitjet e tyre.

Pas incidentit, të gjitha shtigjet e ecjes në zonë janë mbyllur. Rruga nga Bad Ragaz në restorantin Altes Bad Pfäfers është e mbyllur deri të hënën në mbrëmje, përcjell albinfo.ch. Rruga rreth katër kilometra do të kontrollohet nga ekspertët të hënën.

Alte Badstrasse inspektohet vizualisht tri herë në javë nga punonjësit e inspektoratit rrugor në Buchs. Kontrolli i fundit ishte të premten pasdite. Në pranverë, shtegu kontrollohet nga ekspertët e pyjeve dhe priten pemët nëse është e nevojshme.

---