Fehmi Fetahi, një histori e vërtetë suksesi, “prej pjatalarësit te milioneri”

Kështu e përshkruan radioja e transmetuesit publik të Zvicrës SRF karrierën e Fehmi Fetahit, biznesmenit shqiptar nga Zvicra

Jo vetëm i integruar, por njeri me karrierë të vërtetë “prej pjatalarësi te milioneri”. Kështu e përshkruan radioja e transmetuesit publik të Zvicrës SRF karrierën e Fehmi Fetahit, biznesmenit shqiptar që është ngritur në Zvicër dhe është bërë i njohur me investimin e tij të madh në Kosovë, respektivisht në Gjilan, “Vali Ranch”.

Kronika që i kushtohet Fehmi Fetahit emetohet si ilustrim në një emision që bën fjalë për përvjetorin e 60-të të Qendrës Profesionale për integrim “FABIA” në Lucern, që do të shënohet nesër, më 2 qershor, shkruan albinfo.ch. Këtë qendër e udhëheq prej vitesh shqiptari tjetër nga Kosova, Hamit Zeqiri.

Fehmi Fetahi flet për fillimet e tij në Zvicër. Ai kishte ardhur në vitin 1982, pasi kishte ndërprerë studimet për stomatologji në Prishtinë. Këtu, ashtu sikurse shumica e të huajve, ai filloi nga punët e rënda fizike për të ndihmuar familjen në Kosovë.

Fetahi rrëfen tutje për kalimin e tij nga puna si punëtor fizik në themelimin e kompanisë “Fetaxid”, të cilën që nga fillimi e udhëheq së bashku me gruan e tij zvicerane, Sarah, shkruan albinfo.ch. Ai thekson veç tjerash se si i huaj, të duhet të dëshmohesh dyfish më shumë se një zviceran, i lindur këtu, për të pasur suksesin e njëjtë me të.

Për më shumë, ata që e njohin gjermanishten zvicerane, mund ta ndjekin në linkun më poshtë:

---