Kapet në Gjermani shqiptari 25-vjeçar me 3 kilogramë kokainë

Pas demontimit të disa pjesëve të automjetit, efektivët e policisë gjetën një "strehë" kontrabande të instaluar në mënyrë profesionale

Në fillim të majit, hetuesit e policisë kufitare të Pfronten kanë kontrolluar një 25-vjeçar me nënshtetësi shqiptare në A7 pranë Füssen, rrugës për në Austri, shkruan allgaeuer-zeitung.de.

Për shkak se hetuesit konstatuan mospërputhje në deklarimet e tij gjatë kontrollit të realizuar, ata e morën burrin me makinën e tij në zyrën e tyre, në Pfronten.

Aty, pas demontimit të disa pjesëve të automjetit, efektivët e policisë gjetën një “strehë” kontrabande të instaluar në mënyrë profesionale, transmeton albinfo.ch. Aty ishin fshehur tre kilogramë kokainë. Kokaina ishte menduar, sipas policisë, për t’u shpërndarë në Evropën Jugore.

Me kërkesë të prokurorisë publike të Kempten-it, 25-vjeçari u soll para gjyqtarit hetues në Gjykatën e Landit, në Kempten.

Gjykatësi ka ndjekur kërkesën e prokurorisë, kështu që i riu shqiptar është dërguar në një burg bavarez.

---