Reagon Angela Merkel për agresionin rus në Ukrainë

Edhe ish-kancelarja gjermane, Angela Merkel, ka dënuar sulmin e Rusisë ndaj Ukrainës, të cilin ajo e quajti një pikë kthese në histori, përcjell albinfo.ch.

Këtë ajo e ka deklaruar për agjencinë gjermane të lajmeve dpa.

“Kjo luftë agresioni nga Rusia shënon një pikë kthese të thellë në historinë e Evropës pas përfundimit të Luftës së Ftohtë. Unë e dënoj atë në termat më të ashpër të mundshëm”, tha Merkel.

Sipas saj, “nuk ka asnjë justifikim për këtë shkelje flagrante të ligjit ndërkombëtar”.

Merkel shprehu solidaritetin e saj me popullin ukrainas dhe qeverinë e udhëhequr nga Presidenti Volodymyr Zelensky, “në këto orë dhe ditë të frikshme”.

Ish-kancelarja shprehu gjithashtu “mbështetjen e saj të plotë” për përpjekjet e qeverisë gjermane, BE-së, NATO-s, OKB-së dhe G7-së në një përpjekje për t’i dhënë fund luftës.

Merkel e bëri të qartë se sulmi i ri i Rusisë ndaj integritetit territorial dhe sovranitetit të një shteti të pavarur këtë herë prek gjithë Ukrainën.

Në vitin 2014, Rusia pushtoi gadishullin ukrainas të Krimesë në Detin e Zi.

Gjatë qëndrimit të saj si kancelare gjermane, Merkel punoi për të mbajtur të hapura kanalet e komunikimit me Putinin. Në vitin 2015, ajo dhe presidenti i atëhershëm francez, Francois Hollande, vepruan si ndërmjetës në negociatat mbi një plan paqeje për Ukrainën lindore në Minsk.