Gjermania humbi 330 miliardë euro gjatë pandemisë

Kjo konsiderohet si kriza më e rëndë ekonomike globale që nga depresioni i madh i viteve 1930

Një nga institutet kryesore ekonomike të Gjermanisë ka llogaritur se pandemia ka reduktuar prodhimin ekonomik gjerman me rreth 330 miliardë euro (375 miliardë dollarë) gjatë dy vjetëve të fundit.

”Në vend që gjatë dy viteve, 2020 dhe 2021, të rritej respektivisht me 1,3%, ekonomia është tkurrur, ndërsa humbjet korrespondojnë me 10% të PBB-së të 2019-ës”, raportoi instituti IFO, transmeton Dpa, përcjell Albinfo.ch.

Eksperti Timo Wollmershauser shtoi se ”kjo statistikë nuk merr parasysh humbjet e ardhshme në krijimin e vlerave, për shembull, për shkak të mangësive në arsim”.

Kreu i institutit me qendër në Mynih, Clemens Fuest, e përshkroi pandeminë si “kriza më e rëndë ekonomike globale që nga Depresioni i Madh i viteve 1930”.

Llogaritjet e IFO-s për pasojat e pandemisë janë pak më të ulëta se ato të Institutit Ekonomik Gjerman (IW) me qendër në Këln, i cili kishte llogaritur një humbje prej 350 miliardë eurosh.

---