Shqipëria me çmimin më të lartë të energjisë në rajon

Çmimi i energjisë elektrike në Shqipëri është i lartë në krahasim më vendet e rajonit.

Sipas Euronews Albania, edhe pse prodhon rreth 70 për qind të energjisë nga hidrocentralet brenda vendit, tarifat e energjisë elektrike në Shqipëri mbeten të larta edhe me çmimet e pandryshuara që nga viti 2014.
Kosova është vendi i parë në rajon që vendosi të rrisë çmimin e energjisë elektrike. Në kushtet e emergjencës dhe me çmimet e rritura të importit, Qeveria e Albin Kurtit rriti çmimin për 20 për qind të konsumatorëve.

Në anën tjetër, Shqipëria e Maqedonia e Veriut kanë shpallur gjithashtu gjendjen e jashtëzakonshme në këtë sektor, ndërkohë që Qeveria shqiptare ka lënë të hapur rishikimin e çmimit vetëm për bizneset e mëdha.

Çdo shtet aplikon metoda të ndryshme për caktimin e çmimit të energjisë. Në Shqipëri, prej vitit 2014, familjarët paguajnë 9.5 lekë [0.08 euro] për kilovat në orë, bizneset 14 lekë [0.1 euro], ndërsa shtresat e varfra mbrohen me ulje të çmimit.

Megjithatë, nga llogaritja e çmimit mesatar të konsumit, Serbia del se ka çmimin më të lirë të energjisë elektrike në rajon, e ndjekur nga Kosova. Ndërkohë, Shqipëria dhe Mali i Zi kanë çmimet më të larta në rajon.
Kujtojmë së Shqipëria prodhon rreth 5 milionë MegaWatt në vit, nga 7 milionë MegaWatt që i nevojiten në total.

---