Rekord i ngritjes së çmimeve në BE

Bashkimi Evropian në janar regjistroi rekordin e inflacionit prej 5.1 për qind.

Çdo gjë është më e shtrenjtë se një vit më parë në zonën Euro, veshjet, ushqimet, aparatet shtëpiake dhe sigurisht energjia.

Sipas Eurostat, në 19 vendet që ndajnë monedhën e përbashkët, çmimet e energjisë janë shkaku kryesor për këtë situatë.
Ato janë 28.6% më të shtrenjta nga sa ishin në 12 muajt e fundit, transmeton Euronews, përcjell Albinfo.ch.

Por situata është shumë ndryshe nëse e shohim nga vendi në vend. Lituania, Estonia, Sllovakia, Belgjika dhe Letonia janë në krye të listës, ndërsa Luksemburgu, Malta, Portugalia, Finlanda dhe Franca janë në fund.

Të gjithë i kanë kthyer sytë tek mbledhja e së enjtes e Bankës Qendrore Evropiane.

Analistët thonë se tregjet do të shohin nëse do të ketë ndonjë ndryshim në parashikimin e bankës.

Një prej tyre është rënia e inflacionit gjatë këtij viti dhe në vitet 2023-2024, kur do të bjerë në 1.8 për qind.

---