Ministri Berset premton për javën e ardhshme heqjen e karantinës

"Për javën e ardhshme mund të diskutojmë heqjen e karantinës dhe shndërrimin (zbutjen) e statusit të "zyrës në shtëpi", nga detyrimi në rekomandim"

Ministri i Shëndetësisë Alain Berset sot ka qenë mysafir në kantonin Aargau dhe ndër të tjera ka vizituar edhe Spitalin e sapondërtuar Kantonal të Aaraut, transmeton albinfo.ch. Në konferencën për media që ka mbajtur pas kësaj, Këshilli Federal veç tjerash ka thënë se: “pothuajse në të gjitha kategoritë e moshave ne tani kemi një imunitet midis 90 dhe 95 për qind, ndonjëherë edhe 96 për qind”.

Edhe në grupmoshën 10 deri në 19 vjeç, rreth 87 për qind tashmë kanë rënë në kontakt me virusin – qoftë përmes vaksinimit ose infeksionit.

Berset nuk dëshiron ende të komentojë në mënyrë specifike rreth lehtësimeve të mëtejshme që Këshilli Federal mund të vendosë hap pas hapi, raporton srf.ch.

Këshilli Federal ende dëshiron të qëndrojë në një rrugë të mesme midis kufizimit të kujdesshëm dhe relaksimit. Alain Berset thotë: “Çertifikata nuk është vendosr për të mbetur përgjithmonë”. Por megjithatë, certifikatat janë ende të domosdoshme për udhëtime dhe janë gjithashtu të dobishme brenda vendit për sigurinë, për shembull në aktivitete, organizime.

Edhe një herë, Alain Berset  në këtë konferencë ka ngjallur shpresën për një fund të pandemisë. Duke ju referuar mbledhjes së radhës të Këshillit Federal më 2 shkurt, ai është shprehur: “Për javën e ardhshme mund të diskutojmë heqjen e karantinës dhe shndërrimin (zbutjen) e statusit të “zyrës në shtëpi”, nga detyrimi në rekomandim, përcjell albinfo.ch Por: Të gjitha masat e koronës nuk do të hiqen brenda natës, ky është një proces”, ka thënë ai.

---