OBSH: Nuk e dimë nëse Omicron është më ngjitës

(KEYSTONE/Ti-Press/Elia Bianchi)

Një numër më i madh shtetesh në gjithë botën po raportojnë rastet e para të të infektuarve me variantin e ri të Covid-19 të quajtur Omicron. Shumë vende kanë vendosur të mbyllin kufijtë për udhëtimet ndërkombëtare, ndërsa shkencëtarët janë ende në kërkim për të përcaktuar sesa i rrezikshëm mund të jetë ky mutacion i virusit.

‘Ne ende nuk e dimë nëse Omicron është më shumë i transmetueshëm, shkakton sëmundje më të rëndë, më shumë riinfektime apo ka më shumë rrezik për të mposhtur vaksinat. Shkencëtarët e OBSH-së në gjithë botën po punojnë me urgjencë për t’u dhënë përgjigje këtyre pikëpyetjeve. Shfaqja e Omicron është një tjetër kujtesë se megjithëse shumë prej nesh mund të mendojnë se i dhamë fund   COVID-19,  por nuk ka përfunduar”, u shpreh  kreu i OBSH-së, Tedros Adhanom Ghebreyesus.

Spanja është bërë shteti i fundit, i cili ka raportuar rastin e parë me Omicron. I infektuar është një pasagjer i rikthyer nga Afrika e Jugut, vendi ku u zbulua për herë të parë varianti i virusit.

Pjesa më e madhe e të infektuarve në mbarë botën kanë qenë udhëtarë të ardhur nga jashtë. Rastet e reja në Portugali dhe Skoci kanë shtuar frikën se Omicron mund të përhapet edhe në nivel lokal.

Kufizimet e udhëtimit variojnë nga ndalimi i të gjitha fluturimeve në Marok deri te ndalimi i hyrjes për vizitorët e huaj në Izrael dhe Japoni.

Mbretëria e Bashkuar me të tjera vende po u bën thirrje të gjithë vizitorëve që të bëjnë një test PCR pas mbërritjes dhe të izolohen derisa individi të marrë një rezultat negativ të testit.

Shumica e anëtarëve të Bashkimit Evropian po zgjerojnë gjithashtu programet e tyre të vaksinimit. Nuk duhet harruar se Delta është ende varianti dominues.

Pavarësisht shqetësimit global, shkencëtarët pohojnë se janë të sigurt se nëse u jepet kohë do të jenë në gjendje të përshtaten ose të zhvillojnë vaksina për të luftuar variantin e ri nëse është e nevojshme. Por, kanë ende nevojë për pak kohë./Euronews