Liderët politikë nga Kosova: Ndajmë dhimbjen me familjet e viktimave

Presidentja e vendit, Vjosa Osmani, ka ngushëlluar familjarët e viktimave të aksidentit tragjik që ndodhi në orët e hershme të mëngjesit të sotëm në Bullgari.

“E trishtuar nga lajmi tragjik për përfshirjen nga flakët të një autobusi udhëtarësh nga Maqedonia e Veriut, në afërsi të Sofjes, në të cilin humbën jetën së paku 46 persona. Në këtë moment pikëllimi të thellë, ndajmë dhimbjen me familjet e viktimave dhe lutemi për të mbijetuarit”.

Osmani mes tjerash u shpreh ngushëllime edhe autoriteteve të Maqedonisë së Veriut edhe atyre të Bullgarisë, teksa ka rikujtuar edhe aksidentin që ndodhi muaj më parë në Kroaci, ku vdiqën 10 kosovarë.

“U shprehim ngushëllime popullit dhe autoriteteve të fqinjit tonë, Maqedonisë së Veriut, prej nga vinin shumica e udhëtarëve, si dhe atyre të Bullgarisë, në tokën e të cilëve ndodhi tragjedia”.

“Republika e Kosovës vetëm pak kohë më parë e përjetoi një tragjedi të tillë dhe i di mirë përmasat e dhimbjeve të tilla, por edhe nevojën për të reaguar shpejt, prandaj do t’u qëndrojmë afër miqve tanë në këto momente të vështira për ta”, ka shkruar Osmani në rrjetin social Facebook.

Nga ana tjetër, edhe kryeministri i Kosovës, Albin Kurti, është shprehur i trishtuar dhe i pikëlluar nga lajmi për aksidentin tragjik në Bullgari.

“Shpreh ngushëllimet më të sinqerta dhe ndaj dhimbjen me familjet e viktimave, dhe u bashkohem lutjeve për shërim sa më të shpejtë të të lënduarve. Momente të vështira si këto lehtësohen duke i qëndruar pranë njëri-tjetrit.  Republika e Kosovës bashkëndjen me Maqedoninë e Veriut, popullin e saj dhe të gjithë shqiptarët e tronditur nga ky lajm i kobshëm, dhe shpreh gatishmërinë e plotë për të ofruar ndihmën e saj në çdo kapacitet”, ka shkruar ai.

Po ashtu, edhe ministrja e Punëve të Jashtme, Donika Gërvalla, ka reaguar pas vdekjes së dhjetëra qytetarëve të Maqedonisë së Veriut në aksidentin tragjik me autobus në Bullgari. Gërvalla ka shprehur ngushëllime dhe u ka ofruar mbështetje institucioneve të Maqedonisë së Veriut. “Me pikëllim të thellë mora lajmin për vdekjen e dhjetëra qytetarëve nga Maqedonia e Veriut në aksidentin tragjik në Bullgari. Shpreh ngushëllimet më të sinqerta dhe lutem që të lënduarit të shërohen sa më parë. Kosova do të jetë pranë qytetarëve dhe institucioneve të Maqedonisë së Veriut në këtë moment të kobshëm”, ka shkruar Gërvalla.