Reagon Organizata e Veteranëve: UÇK ishte çlirimtare dhe jo terroriste

Faton Klinaku nga Organizata e Veteranëve të Luftës së UÇK-së ka reaguar pasi mediat zvicerane e etiketuan UÇK-në si organizatë terroriste

Mediat zvicerane sërish në qendër të vëmendjes sa i përket futbollistëve shqiptarë. Pas rastit të vitit 2018, kur Granit Xhaka dhe Xherdan Shaqiri e bënë shqiponjën me duar ndaj Serbisë, tashmë kanë ‘shpërthyer’ kur një tifoz pas ndeshjes së Zvicrës ndaj Irlandës së Veriut, i ka vendosur Shaqirit xhaketën me emblemë të UÇK-së, duke e quajtur organizatë terroriste, pa asnjë fakt dhe dëshmi.

Në lidhje me këtë rast, albinfo.ch, ka kontaktuar Faton Klinakun, U. D. i kryetarit të Organizatës së Veteranëve të Luftës së UÇK-së. “Nëse UÇK është organizatë terroriste, atëherë edhe NATO qenka, sepse NATO ka ndihmuar në çlirimin e Kosovës. UÇK ka luftuar kundër pushtuesit dhe asnjëherë ndaj civilëve. Nuk ka asnjë fakt që UÇK është organizatë terroriste. Mediat janë të ndikuara nga ky lobim i Rusisë dhe Serbisë. E theksoj edhe një herë se UÇK ka luftuar kundër pushtuesve serbë dhe nuk ka kryer krime ndaj civilëve”, është shprehur Klinaku për albinfo.ch.

“Nuk ka asnjë dëshmi apo fakt se e kanë quajtur organizatë terroriste. Nuk e di pse ka ndodhur kjo”, shtoi tutje Klinaku.

Xherdan Shaqiri pasi pa xhaketën me emblemë të UCK-së e ka larguar me buzëqeshje, kurse mediat zvicerane filluan duke e quajtur organizatë terroriste, edhe pse më pas disa kanë ndryshuar titujt, pas shumë reagimeve.

Si e shpallën disa media zvicerane UÇK-në “organizatë terroriste”

---