Sveçla: Epoka kur Republika e Kosovës nënshtrohej ka përfunduar

Ministri i Punëve të Brendshme, Xhelal Sveçla, duke komentuar procesin e reciprocitetit në targa me Serbinë, u shpreh se “epoka kur Republika e Kosovës nënshtrohet ka përfunduar”.

Këtë mesazh thotë ministri Sveçla tashmë e ka kuptuar jo vetëm Beogradi, por edhe Bashkimi Evropian, i cili vepron si palë ndërmjetësuese për vijimin e dialogut mes Kosovës dhe Serbisë.

“Epoka kur Republika e Kosovës nënshtrohet ka përfunduar, dhe këtë mesazh tashmë e ka kuptuar Beogradi dhe Brukseli. Kosova ka Qeveri të re sovrane, të cilën askush nuk mund ta shantazhojë për shkak të hiseve në krim e korrupsion”, shkruan ai.

Sipas tij, Policia e Kosovës dëshmoi se është “polici profesionale dhe e gatshme të mbrojë sovranitetin e shtetit dhe ofrojë rend dhe siguri, pa dallim”.

Aplikimin e masës së reciprocitetit ai e cilëson si një hap pozitiv për shtetin e Kosovës, ndërsa për këtë jep argumentin si vijon:

“Megjithatë, Kosova bëri dhe një hap para. Mbi parimin e reciprocitetit vendosi që të bashkëpunojë me aleatët tanë dhe pas tërheqjes së barrikadave, të largojë Njësitë Speciale por në bashkëpunim me KFOR-in të sigurojë Policinë Kufitare dhe mbrojë dhe më tutje kufirin me Serbinë”

Në fund, ministri i Brendshën thekson dhe jep garancinë për qytetarët se sovraniteti dhe “ligjshmëria do të shtrihet në tërë territorin e Republikës së Kosovës, me çdo kusht”.