Jeta në Zvicër, 51% më e shtrenjtë se në Gjermani

Kostoja e jetesës në Zvicër në korrik ishte për më shumë se gjysmën (51 për qind) më e lartë se në Gjermani

Megjithë faktin se çmimet e konsumit janë rritur kohët e fundit në masën më të madhe që nga 28 vjet më parë, jetesa në Gjermani është relativisht e lirë. Ky është përfundimi në të cilin ka ardhur Zyra Federale e Statistikave në Gjermani, shkruan srf.ch.

Ajo ka krahasuar koston gjermane të jetesës me atë të vendeve të tjera evropiane. Sipas statistikave të konsultuara, jeta është më e shtrenjta në Zvicër, transmeton albinfo.ch. Ose: të jetosh në Zvicër është përgjysmë më shtrenjtë sesa në Gjermani.

Kostoja e jetesës në Zvicër në korrik ishte për më shumë se gjysmën (51 për qind) më e lartë se në Gjermani, ka shkruar Zyra Federale e Statistikave e Gjermanisë, në një njoftim për shtyp.

“Përveç Zvicrës, kostoja e jetesës ishte më e lartë sesa në Gjermani edhe në shumicën e vendeve të tjera fqinje”, ka vazhduar ajo.

Kështu, në Danimarkë, për shembull, konsumatorëve u është dashur të paguanin 28 për qind më shumë për të blerë një shportë konsumi ndërsa në Luksemburg 25 për qind më shumë. Në Holandë diferenca e çmimeve ndaj Gjermanisë ishte shtatë për qind, në Belgjikë dhe Austri nga pesë për qind  dhe në Francë katër për qind, transmeton albinfo.ch.

Në Poloni, nga ana tjetër, standardi i jetesës ishte 46 për qind më i lirë se në Gjermani ndërsa në Republikën Çeke, 28 për qind.

Sipas zyrës statistikore, një krahasim me vendet e tjera evropiane tregon gjithashtu dallime të mëdha në koston e jetesës: Kështu, Në Islandë kostoja e jetesës ishte 40 për qind më e lartë se në Gjermani ndërsa 30 për qind më e lartë ishte ajo në Norvegji.

Në të kundërt, kostoja e jetesës ishte për rreth përgjysmë më e ulët në vendet si: Bullgaria, Rumania dhe Bosnjë e Hercegovina.

Në gusht, çmimet e konsumit në Gjermani janë rritur për 3.9 për qind, që ishte ngritja më e madhe që nga viti 1993. Kjo lëvizje është shkaktuar nga rritja e çmimeve të energjisë dhe ajo e të ashtuquajturit “efekt bazë”: Për shkak të krizës së koronës, shumë mallra dhe shërbime, vitin e kaluar, ishin në dispozicion për një çmim më të ulët, veçanërisht pasi TVSH-ja gjithashtu ishte zvogëluar herë pas here.

Ky efekt tani është përmbysur. Instituti Ifo parashikon një normë mesatare të inflacionit prej 3.0 për qind për këtë vit, përcjell albinfo.ch. Hera e fundit që kishte një vlerë më të lartë ishte në vitin 1993 me 4.5 për qind. Në vitin 2020, norma e inflacionit ishte vetëm 0.5 për qind.

---